Niddubita kemm din hi Università
Matul din il-ġimgħa ħarġu
rapporti serji f’numru ta’ siti ta’ gazzetti lokali dwar dak li qed jiġri
fl-American University of Malta.
The Shift News, sit immexxi
minn tliet ġurnalisti indipendenti Maltin, ħareġ intervista ma’ ex-impjegata
ta’ din is-suppost Università li l-Gvern ta’ Joseph Muscat għoġbu jtiha b’rigal Baċir
Numru 1 f’Bormla (li oriġinarjment kien maħsub li jgħaddi għand l-Università ta’ Malta) u medda art verġni fiż-Żonqor (li kienet tagħmel parti minn
park nazzjonali skedat). Ir-rapport jinsab hawn.
Din l-ex-impjegata tkellmet
mal-ġurnalist James Debono, u qaltlu li għandha dubji serji fuq kemm hi kienet
verament qed taħdem għal Università. Qaltlu li hi, flimkien ma’ membri oħra tal-Fakultà,
tkeċċew matul il-vaganzi tal-Milied eżatt qabel temmew iż-żmien ta’ probation. Din kompliet tikkonferma dak
li deher fis-sit internazzjonali Inside Higher Ed, li żvela kif din l-Università keċċiet kważi l-membri kollha tal-Fakultajiet tagħha (link).
Dawn li tkeċċew tkellmu wkoll ma’ dan is-sit, b’kundizzjoni li jibqgħu anonimi
minħabba kundizzjonijiet strambi ta’ kunfidenzjalità li kellhom fil-kuntratt
tagħhom u li mhux soltu jkun f’kuntratti ma’ Universitajiet simili. Huma qalu
kif uħud minnhom ġew minn postijiet bħall-Istati Uniti, telqu kollox, biex wara
ftit xhur tkeċċew. Qed jissuspettaw li din l-Università ser terġa’ tkun
qed timpjega numru ta’ professuri u impjegati oħra, u terġa’ tkeċċiehom wara
sitt xhur qabel jagħlqilhom iż-żmien ta’ probation,
u jħossu li kważi kważi qed isir minn kollox biex din l-istituzzjoni ma
tirnexxix.
Tkellem ukoll il-Professur
Bernard Gauci, li qal kif hu tkeċċa b’mod abbużiv wara li ġi operat u ma
tħalliex jingħata ftit ġimgħat żmien jirkupra mill-operazzjoni.
Dawn qed jgħidu dak li
ilhom iħossu diversi Maltin: li din ma hi Università xejn, u li
l-iskop orġiniali għala din l-art ingħatat b’xejn lil dawn il-kuntratturi ma
kinetx l-edukazzjoni imma kienet spekulazzjoni ta’ proprjetà, biex art prima
mal-kosta ta’ Malta tiġi żviluppata f’lukandi u appartamenti. U ejja niftakru
li Sadeen m’għandhom l-ebda ħjiel ta’ edukazzjoni, huma kuntratturi u
żviluppaturi tal-lukandi, li minn fuq daharna jidher li ħa jkunu qed jagħmlu
l-miljuni. Il-mistoqsija hi, min ser ikun qed jagħmel kemxa tajba magħhom biex
ippermetta li l-art tagħna tiġi mogħtija lilhom b’dan il-mod?
Quddiem dan l-abbuż
il-poplu Malti u l-Partit Nazzjonalista mhux ser jibqgħu kwieti, u infatti
fil-Parlament l-Oppożizzjoni ressqet mozzjoni biex din l-art fiż-Żonqor terġa’
tingħata lura lill-poplu Malti ġaladarba l-kundizzjonijiet li għalihom ingħatat
lil Sadeen ma ntlaħqux.
L-Artful Dodger tal-Ewropa
Hekk sejjaħ lill-Prim
Ministru Joseph Muscat il-ġurnalist tal-BBC John Sweeney, f’intervista iebsa li
xxandret waqt BBC Newsnight (tista’ tara din l-intervista hawn).
Artful Dodger huwa karattru mill-ktieb Oliver Twist, u kien pickpocket, ħalliel makakk ħafna li kien
jisraq mill-bwiet tan-nies mingħajr ma’ dawn jindunaw. Skont Sweeney, Muscat
huwa ħalliel makakk ħafna li qed jirnexxielu ma jinqabadx, u jgħid hekk lil
Muscat f’wiċċu waqt l-intervista. Muscat jidher skomdu ħafna jwieġeb fuq
il-qtil ta’ Caruana Galizia u fuq l-involviment tal-Gvern tiegħu fil-Panama
Papers, fir-rapporti tal-FIAU u fl-abbużi tal-Pilatus Bank. Din issegwi l-intervista
imbarazzanti li kien ta d-Deputat Prim Ministru Chris Fearne lill-ġurnalist Tim
Sebastian fuq Conflict Zone.
Huwa diffiċli għal Muscat u l-Ministri tiegħu li jġibu ruħu mal-ġurnalisti
barranin bl-istess arroganza li biha jġib ruħhom mal-ġurnalisti Maltin.
Nissuġġerilkom taraw din l-intervista, biex taraw kif Malta u l-Gvern tagħha
qed jiġu perċepiti mal-Ewropa u mad-dinja. Ħasra li r-reputazzjoni li bnejna
matul is-snin qed tiġi mmermra u mtappna minn dawn in-nies.
Dan l-artiklu deher fil-Mument tal-Ħadd 14 ta' Jannar 2018.
Comments
Post a Comment