Hekk irrefera
għad-deal mal-Vitals il-Kap
tal-Partit Nazzjonalista Adrian Delia meta fi tmiem il-ġimgħa li għaddiet kien
qed jitkellem waqt numru ta’ attivitajiet fil-gżira Għawdxija.
U hemm diversi
raġunijiet għala dan id-deal huwa
l-milja tal-korruzzjoni ta’ dan il-Gvern. Ejja nelenkaw uħud minnhom.
L-ewwelnett,
il-Gvern għadda tliet sptarijiet lil Vitals Group, u mhux biss għaddiehomlhom,
imma ftiehem li ħa jħallashom mas-€70 miljun fis-sena għal 30 sena sħaħ. Minn
dawn, kemm ilu li sar il-ftehim il-Gvern ġa għaddielhom mal-€50 miljun. Mhux
hekk biss, sirna nafu wkoll minn leaks ta’
dan il-ftehim, għax il-Gvern żamm kollox moħbi, li l-Gvern biegħ l-apparat
kollu li kien hemm f’dawn l-isptarijiet għal ewro wieħed biss! Iva, l-apparat
kollu li kien hemm fl-Isptar Ġenerali ta’ Għawdex, fl-Isptar Karen Grech u
fl-Isptar San Luqa, inbiegħ għal Ewro wieħed biss.
It-tieni,
il-Gvern suppost rabat lil Vitals li jinvestu mal-€200 miljun biex jitranġaw u
jirriabilitaw dawn l-isptarijiet. Sal-lum, ħafna għadhom ma jafux dawn
il-miljuni fejn intefqu, u jekk qattx intefqu, għax dawn l-isptarijiet, kif
kienu għadhom.
It-tielet,
il-Gvern fil-kuntratt kien stipula li Vitals ma jistgħux ibiegħu dan il-ftehim
lil ħadd qabel ma jgħaddu tal-anqas tliet snin, sakemm mhux bil-kunsens bil-miktub
tal-Gvern. Issa nsiru nafu minn rapport li deher fis-Sunday Times li l-bejgħ
tal-Vitals sar aktar minn ġimgħa qabel inġieb il-kunsens bil-miktub tal-Gvern!
Jiġifieri anke’ il-bejgħ tal-Vitals lil Steward Healthcare huwa bejgħ illegali.
Ir-raba’, għadu
s’issa ħadd ma jaf min hu jew min huma s-sidien tal-Vitals, moħbija wara
kumpanija offshore reġistrata
fil-British Virgin Islands. Il-Vitals kienu ħa jkunu obbligati jgħidu min huma
skont l-aħħar direttivi approvati mill-Unjoni Ewropea u li għadhom kemm daħlu
fis-seħħ. Iżda eżatt qabel daħlu dawn id-direttivi, din inbiegħet. Għadna
s’issa ma nafux min huma dawn is-sidien li għamlu l-miljuni f’senserija minn
fuq is-servizz tas-saħħa tagħna.
Dan kollu juri li
kien hemm skop ulterjuri għalfejn sar dan l-arranġament. Huwa ċar li l-iskop ma
kienx li s-servizz tas-saħħa tagħna jmur għall-aħjar. L-iskop ma kienx
l-interess pubbliku. L-iskop ma kienx li s-servizz jgħaddi għand operatur
privat ta’ kredenzjali għoljin u ta’ esperjenza fis-settur.
L-iskop kien li
minn fuq dahar il-poplu Malti, xi ħadd jagħmel il-miljuni billi jingħata ftehim
vantaġġjuż ħafna, u mbagħad hu jagħmel qliegħ kbir billi jbiegħ dan il-ftehim
lil ħaddieħor. Il-mistoqsija li qed jistaqsi kulħadd hija, min hu dan ix-“xi
ħadd”? Min sar miljunarju b’dan l-arranġament?
U meta wieħed
jiftakar li l-politiku li kien responsabbli minn dan il-ftehim, Konrad Mizzi, u
c-Chief of Staff tal-Prim Ministru, Keith Schembri, huma tnejn min-nies li
nqabdu b’kumpaniji offshore fil-Panama,
u li nqabdu jaħslu l-flus u jdaħlu commissions
minn fuq it-tanker tal-LNG li nġieb f’Marsaxlokk f’rapporti ċari tal-FIAU,
wieħed bir-raġun ikollu suspetti kbar fuq x’kien l-interess ta’ dan il-ftehim
oxxen.
Mhux ta’ b’xejn
li anke’ l-Grupp Soċjalista fil-Parlament Ewropew, immexxi minn Ana Gomes, qed
isejħu lil Muscat biex ineħħi lil dawn it-tnejn u jirriżenja magħhom. Jekk le,
skont dak li deher fil-ġurnal influwenti ewropew Politico, is-Soċjalisti ser
ikunu qed jirrikunsidraw il-pożizzjoni ta’ Muscat fil-Grupp tagħhom.
Min-naħa tagħha, l-Oppożizzjoni ser tkompli ssemma’
leħinha fuq dan il-każ u tieħu l-passi neċessarji, jekk hemm bżonn anke’
fil-Qrati, biex tissalvagwardja l-interess tal-poplu Malti u tas-servizz
tas-saħħa tiegħu.
Dan l-artiklu deher f'In-Nazzjon tal-Erbgħa 17 ta' Jannar 2018.
Comments
Post a Comment